EXITPOLLS2024: తెలంగాణలోని 17 పార్లమెంట్ స్థానాలకు జరిగిన ఎన్నికల్లో కాంగ్రెస్, బీజేపీ మధ్య నువ్వా , నేనా అనే పోరు న‌డిచిన‌ట్లు పీపుల్స్‌పల్స్ రీసెర్చ్ సంస్థ వెల్ల‌డించింది. కాంగ్రెస్ 7 నుంచి 9 స్థానాలు.. బీజేపీ 6 నుంచి 8 స్థానాలు.. బీఆర్‌ఎస్‌ 0-1, ఎంఐఎం 1 సీటు గెలుపొందే అవకాశాలున్నట్లు స‌ర్వేలో తేలింది. 10 సంవత్సరాల పాటు అధికారంలో ఉండి ఇటీవల జరిగిన అసెంబ్లీ ఎన్నికల్లో ఓటమి పాలయిన బీఆర్‌ఎస్‌ పార్టీకి 1 పార్లమెంట్ స్థానం కూడా దక్కే అవకాశాలు త‌క్కువ‌గా ఉన్న‌ట్లు స‌ర్వే సంస్థ తెలిపింది.
ఇక అధికార కాంగ్రెస్ పార్టీ… ఖమ్మం, మహబూబాబాద్‌, వరంగల్‌, పెద్దపల్లి, నల్గొండ, భువనగిరి, నాగర్‌కర్నూల్‌ పార్లమెంట్ స్థానాల్లో గెలుపొందే అవకాశం ఉన్న‌ట్లు పీపుల్స్‌పల్స్ స‌ర్వే సంస్థ వెల్ల‌డించింది. బీజేపీ విష‌యానికొస్తే ..ఆ పార్టీ చేవేళ్ల, సికింద్రాబాద్‌, మల్కాజ్‌గిరి, కరీంనగర్‌, నిజామాబాద్‌, ఆదిలాబాద్‌ పార్లమెంట్ స్థానాల్లో గెలుపొందే అవకాశం ఉన్న‌ట్లు స‌ర్వే సంస్థ ప్ర‌క‌టించింది. ఎంఐఎం పార్టీ హైదరాబాద్‌ పార్లమెంట్ స్థానాన్ని గెలుపొందే అవకాశం ఉంద‌ని.. అయితే ఆ పార్టీకి హైదరాబాద్‌ పార్లమెంట్ స్థానంలో గతంలో జరిగిన ఎన్నికల్లో వచ్చిన మెజార్టీ కన్నా ఈ సారి భారీగా తగ్గే అవకాశం ఉన్న‌ట్లు స‌ర్వేలో తేలింది.
ఇదిలా ఉంటే.. మెదక్‌, మహబూబ్‌నగర్‌, జహీరాబాద్‌ పార్లమెంట్ నియోజకవర్గాల్లో కాంగ్రెస్-బీజేపీ-బీఆర్‌ఎస్‌ మధ్య ముక్కోణపు పోటీ జ‌రిగిన‌ట్లు స‌ర్వే సంస్థ రిపొర్ట్ చెబుతోంది. మొత్తంమీద తెలంగాణ పార్లమెంట్ ఎన్నికల్లో అధికార కాంగ్రెస్ – బీజేపీ మధ్య హోరాహోరి పోరు న‌డిచిన‌ట్లు పీపుల్స్‌పల్స్ స‌ర్వే తెలిపింది.
