Telangana BJP: గవర్నర్ కోటా ఎమ్మెల్సీల విషయంలో రాష్ట్ర గవర్నర్ తీసుకున్న నిర్ణయాన్ని స్వాగతిస్తున్నట్లు కేంద్ర మంత్రి కిషన్ రెడ్డి పేర్కొన్నారు. ఈ నిర్ణయానికి అభినందనలు తెలుపడంతోపాటు ధన్యవాదాలు చెబుతున్నట్లు వెల్లడించారు. గవర్నర్ కోటా, రాష్ట్రపతి కోటాలు మేధావులకు..విద్యావంతులకు.. కవులకు.. కళాకారులకు.. సామాజిక కార్యకర్తలకు ప్రాధాన్యం ఇవ్వాల్సిన నామినేటెడ్ పదవులని అన్నారు.ముఖ్యమంత్రి కేసీఆర్ గతంలో కూడా అనేక క్రిమినల్ కేసులు ఉన్న వ్యక్తులను ఎమ్మెల్సీలుగా నియమించాలని గవర్నర్కు ప్రతిపాదనలు పంపితే.. గౌరవ గవర్నర్ గారు రిజెక్ట్ చేసిన విషయం తెలిసిందేనని గుర్తు చేశారు.కేసీఆర్ కుటుంబానికి సేవ చేసే వ్యక్తులను గవర్నర్ కోటాలో ఎమ్మెల్సీలుగా నియమించాల్సిన అవసరం లేదని స్పష్టం చేశారు.
కాగా బీఆర్ఎస్ ఎమ్మెల్యే టిక్కెట్ ఎవరికి ఇస్తుందంటే .. వాళ్ల కాళ్లదగ్గరపడి ఉండేవాళ్లకు, వాళ్ల మోచేతి నీళ్లు తాగే వాళ్లకు, ఆత్మగౌరవం లేని వాళ్లకు ఇస్తుందని కిషన్ రెడ్డి ఆరోపించారు. గవర్నర్ కోటా నామినేటెడ్ పోస్టులు కూడా అలాంటి వారికే ఇవ్వాలన్నది న్యాయం కాదని.. ఈ విషయంలో గవర్నర్ తీసుకున్న నిర్ణయాన్ని స్వాగతించదగిందని అన్నారు.అనేక పార్టీలు ఫిరాయించిన వారు, కేసీఆర్ కుటుంబానికి మాత్రమే సేవ చేసే వారిని గవర్నర్ రిజెక్ట్ చేశారని తేల్చిచెప్పారు. పార్టీలకు, రాజకీయాలకు అతీతంగా ప్రధాని నరేంద్ర మోడీ .. బీజేపీతో ఏ మాత్రం సంబంధం లేని తెలంగాణ నుంచి ఒక సినీ కథా రచయిత విజయేంద్ర ప్రసాద్ ఎంపీగా ప్రతిపాదిస్తే రాష్ట్రపతి ఆమోదం పొందారని గుర్తు చేశారు. దక్షిణాది నుంచి పీటీ ఉష లాంటి అంతర్జాతీయ క్రీడాకారిణిని ప్రతిపాదించగా రాష్ట్రపతి ఓకే చేశారని వివరించారు. తెలంగాణ గవర్నర్ తీసుకున్న నిర్ణయం సాహసోపేతమైనదాని.. ఆమెకు తెలంగాణ ప్రజల తరఫున ధన్యవాదాలు తెలుపుతున్నట్లు చెప్పుకొచ్చారు. కేసీఆర్కు అనుకూలంగా ఉంటేనే.. గవర్నర్గా వ్యవహరించినట్టా? కేసీఆర్ చేస్తున్న తప్పిదాలు, పొరపాట్లను ఎత్తి చూపుతూ ధైర్యంగా నిర్ణయం తీసుకుంటే.. గవర్నర్గా మీక నచ్చరా? అని కిషన్ రెడ్డి ప్రశ్నించారు.
