Devotional: సనాతన ధర్మం ప్రకారం మరణం అంతం కాదు. అది ఒక దశ ముగింపు… మరో దశకు ఆరంభం.మనిషి శరీరం నశించినా, ఆత్మ నశించదు. తన కర్మల భారంతో, ఆశయాలతో ఆత్మ మరొక ప్రయాణాన్ని ప్రారంభిస్తుంది. ఆ ప్రయాణానికి మార్గదర్శకమే మరణానంతరం చేసే 13 రోజుల క్రియలు.
మరణం అనంతరం:
మరణం సంభవించిన వెంటనే మనిషి స్థూల శరీరాన్ని విడిచి ఆత్మ సూక్ష్మ శరీరంతో ప్రయాణం ప్రారంభిస్తుంది.ఈ సమయంలో ఆత్మకు శరీరంపై, కుటుంబంపై ఇంకా మమకారం మిగిలే ఉంటుంది.అందుకే శాస్త్రాలు శరీరాన్ని అగ్నికి అప్పగించమని సూచిస్తాయి.దహన సంస్కారం ద్వారా ఆత్మకు విముక్తి మార్గం సుగమమవుతుందని విశ్వాసం.
మొదటి మూడు రోజులు…
గరుడ పురాణం ప్రకారం మరణం తర్వాత మొదటి మూడు రోజులు ఆత్మ తన నివాసం, కుటుంబ సభ్యుల చుట్టూ తిరుగుతుందని నమ్మకం.ఈ దశలో
ఆత్మకు దారి తెలియని స్థితి ఉంటుంది.అందుకే కుటుంబ సభ్యులు శాంతి పాఠాలు, ప్రార్థనలు చేస్తూ
ఆత్మకు శాంతి చేకూర్చే ప్రయత్నం చేస్తారు.
4వ రోజు నుంచి 10వ రోజు..
ఈ కాలంలో ఆత్మ ప్రేత స్థితిలో ఉంటుందని శాస్త్రోక్త భావన. ప్రతిరోజూ చేసే పిండ ప్రదానం, తిల తర్పణం
ఆత్మకు ఆహారంగా, శక్తిగా మారుతాయి. ఈ క్రియల ద్వారానే ఆత్మకు ఒక సూక్ష్మ శరీరం ఏర్పడి
తదుపరి లోక ప్రయాణానికి సిద్ధమవుతుంది.
11వ రోజు…
ఈ రోజు అత్యంత ప్రాధాన్యత కలిగినది. ఏకోదిష్ట శ్రాద్ధం ద్వారా ఆత్మను ప్రేత స్థితి నుంచి పితృ స్థితికి చేర్చుతారు.అంటే భౌతిక బంధాల నుంచి విడిపించి
పితృలోక ప్రయాణానికి మార్గం వేయడం.
12వ రోజు…
ఈ రోజు మరణించిన వ్యక్తి ఆత్మ తన పూర్వీకులతో కలిసిపోతుంది.అంటే పితృ దేవతలలో ఒక భాగంగా మారుతుంది. సపిండీకరణ లేకుంటే ఆత్మకు సంపూర్ణ శాంతి లభించదని శాస్త్రాలు స్పష్టంగా పేర్కొంటాయి.
13వ రోజు…
13వ రోజు ఆత్మ ప్రయాణానికి ముగింపు కాదు.ఇది
ఒక కొత్త ఆధ్యాత్మిక దశకు ఆరంభం. ఈ దశ తర్వాత
ఆత్మ తన కర్మల ఆధారంగా పితృలోకంలో నివసించవచ్చు లేదా మళ్లీ జన్మకు సిద్ధమవుతుంది.
13 రోజులు ఎందుకు ముఖ్యమైనవి?
🔸 ఆత్మకు శాంతి కలిగించడానికి
🔸 కుటుంబ సభ్యులకు మానసిక ధైర్యం కోసం
🔸 పితృ దేవతల ఆశీస్సులు పొందడానికి
సనాతన ధర్మం చెబుతుంది మరణం ముగింపు కాదు…అది ఒక మార్పు మాత్రమే. మన కర్మలే
మన జీవితం మాత్రమే కాదు, మరణానంతర ప్రయాణాన్నీ నిర్ణయిస్తాయి. అందుకే మంచి ఆలోచనలు, మంచి కార్యాలు మన ప్రస్తుత జీవితం తో పాటు మన ఆత్మ ప్రయాణానికీ మార్గదర్శకాలు.
