నవజ్యోత్ సింగ్ సిద్దూ పై సోదరి సంచలన వ్యాఖ్యలు!

పంజాబ్​ అసెంబ్లీ ఎన్నికల వేళ ఆ రాష్ట్ర పీసీసీ అధ్యక్షుడు నవజ్యోత్​ సింగ్​ సిద్ధూ సోదరి సంచలన వ్యాఖ్యలు చేశారు. ఆస్తి కోసం తల్లిని, తనను ఇంట్లోంచి గెంటేశారని సిద్ధూ సోదరి సుమన్​ తూర్ ఆరోపించారు. అమెరికా నుంచి చండీగఢ్​ వచ్చిన ఆమె మీడియా సమావేశంలో తన తల్లి పడిన కష్టాలను తెలుపుతూ కన్నీటీ పర్యంతమయ్యారు.
ఓ విషాదకర ప్రమాదంలో అక్క, కుటుంబ సభ్యులు మరణిస్తే.. సిద్ధూ కనీసం సంతాపం తెలపలేదన్నారు సుమన్ తూర్ . ఈ విషయంపై అతను రాష్ట్ర ప్రజలకు సమాధానం చెప్పాలని ఆమె డిమాండ్ చేశారు. 1986లో తండ్రి భగవత్​ సింగ్​ సిద్ధూ మృతి చెందిన తర్వాత తమ కుటుంబానికి కష్టాలు మొదలయ్యాయన్నారు. ఆ తర్వాత కుటుంబ ఆస్తిని దక్కించుకునేందుకు సిద్ధూ.. తనను, తల్లిని ఇంట్లోంచి గెంటేశాడని ఆమె వాపోయారు. అప్పట్లో ఇంటి నుంచి సమీపంలోని బస్టాండ్​కు నడుచుకుంటూ వెళ్లింది ఇంకా గుర్తుందన్నారు. 1989లో దిల్లీ రైల్వేస్టేషన్​లో తన తల్లి దిక్కులేనిదానిలా మరణించిందని వివరిస్తూ సుమన్ తూర్ తీవ్ర భావోద్వేగానికి లోనయ్యారు.