Movie review:
NewsMinute24 సినిమా సమీక్ష | హైదరాబాద్
భక్తి, ఆధ్యాత్మికత, మానవీయ విలువల నేపథ్యంలో తెరకెక్కిన చిత్రం ‘హనుమాన్ అంశ్’. నీమ్ కరోలీ బాబా జీవితం నుంచి ప్రేరణ పొంది రూపొందిన ఈ చిత్రం అక్టోబర్ 9న తెలుగు ప్రేక్షకుల ముందుకు వచ్చింది. హిందీలో విశేష ఆదరణ పొందిన ఈ సినిమా.. తెలుగు ప్రేక్షకులకు ఎలాంటి అనుభూతిని అందించిందో తెలుసుకుందాం.
కథేంటి?
స్వాతంత్ర్యానికి పూర్వం జరిగే కథాంశంతో ఈ చిత్రాన్ని రూపొందించారు. సైన్స్‌ను మాత్రమే నమ్ముతూ, దైవంపై విశ్వాసం లేని డాక్టర్ రామ్ నందన్ భోంస్లే జీవితంలో చోటుచేసుకున్న అనూహ్య సంఘటనలు కథలో కీలక మలుపులకు కారణమవుతాయి. ఈ క్రమంలో లక్ష్మీనారాయణ శర్మతో ఆయనకు పరిచయం ఏర్పడుతుంది. లక్ష్మీనారాయణ శర్మ కాలక్రమంలో నీమ్ కరోలీ బాబాగా ఎలా మారారు? ఆయన ఆధ్యాత్మిక ప్రయాణం ఎందరి జీవితాలను ప్రభావితం చేసింది? అనే అంశాలను దర్శకుడు తెరపై ఆవిష్కరించారు.
భావోద్వేగాలే ప్రధాన బలం…
భక్తి, ఆధ్యాత్మికత నేపథ్యంలో రూపొందే సినిమాలకు భావోద్వేగాలు ప్రధాన బలం. ఆ విషయంలో ‘హనుమాన్ అంశ్’ ప్రేక్షకులను ఆకట్టుకునే ప్రయత్నం చేసింది. ప్రథమార్థంలో పాత్రల పరిచయానికి ప్రాధాన్యమివ్వగా, ద్వితీయార్థంలో కథ భావోద్వేగాల వైపు మలుపు తిరుగుతుంది. నీమ్ కరోలీ బాబా వ్యక్తిత్వం, ఆయన నిస్వార్థ సేవ, కరుణ వంటి అంశాలను దర్శకుడు విశాల్ చతుర్వేది తెరపై చూపించిన తీరు ప్రశంసనీయం.
ప్రధాన పాత్రలో శోభినావ్ సత్య హుందాగా నటించారు. అతిగా నాటకీయతకు తావివ్వకుండా పాత్రకు అవసరమైన ప్రశాంతతను, సహజత్వాన్ని ప్రదర్శించారు. ఇతర నటీనటులు కూడా తమ పాత్రల పరిధిలో చక్కగా నటించారు.
సంగీతం.. మరో ఆకర్షణ
ఈ చిత్రానికి సంగీతం, నేపథ్య సంగీతం ప్రధాన ఆకర్షణలుగా నిలుస్తాయి. కథలోని భావోద్వేగాలను మరింత ప్రభావవంతంగా ప్రేక్షకులకు చేరవేయడంలో సంగీత విభాగం తన వంతు పాత్ర పోషించింది. రైలులో బ్రిటిష్ అధికారితో జరిగే సంభాషణ, పార్వతి ఇంట్లో భోజనం చేసే సన్నివేశం, ఇంటర్వెల్‌కు ముందు వచ్చే శివుని ప్రతిరూప దృశ్యం ప్రత్యేకంగా ఆకట్టుకుంటాయి.
నాటి కాలాన్ని ప్రతిబింబించే ఛాయాగ్రహణం సినిమాకు అదనపు బలాన్ని ఇచ్చింది. తెలుగు డబ్బింగ్ సహజంగా ఉండటం వల్ల కథనంతో ప్రేక్షకులు సులభంగా అనుసంధానమవుతారు.
నెమ్మదిగా సాగే కథనం..
సినిమాలోని ప్రధాన బలహీనత కథనం నెమ్మదిగా సాగడం. ప్రథమార్థంలో పాత్రల పరిచయానికి ఎక్కువ సమయం కేటాయించడం వల్ల కొన్ని చోట్ల ఆసక్తి తగ్గుతుంది. కొన్ని సన్నివేశాల నిడివిని తగ్గించి ఉంటే సినిమా మరింత ప్రభావవంతంగా ఉండేది. వేగవంతమైన కథనం, భారీ ట్విస్టులు, కమర్షియల్ హంగులు ఆశించే ప్రేక్షకులకు ఈ చిత్రం పూర్తిస్థాయిలో నచ్చకపోవచ్చు.
అయితే, నీమ్ కరోలీ బాబా జీవితం గురించి ముందే అవగాహన ఉన్నవారికి కథ మరింతగా కనెక్ట్ అయ్యే అవకాశం ఉంది. ఆధ్యాత్మిక చిత్రాలను ఇష్టపడే ప్రేక్షకులకు ఇందులోని భావోద్వేగాలు నచ్చుతాయి.
మొత్తంగా ‘హనుమాన్ అంశ్’ భక్తి, మానవత్వం, ఆధ్యాత్మికతను మేళవించిన భావోద్వేగభరితమైన చిత్రం. శోభినావ్ సత్య సహజమైన నటన, ఆకట్టుకునే నేపథ్య సంగీతం, ద్వితీయార్థంలోని కీలక సన్నివేశాలు సినిమాకు ప్రధాన బలంగా నిలుస్తాయి. నెమ్మదిగా సాగే కథనం కొంత సహనాన్ని కోరుకున్నప్పటికీ, ఆధ్యాత్మిక చిత్రాలను ఇష్టపడేవారికి ఈ సినిమా ఒక మంచి అనుభూతిని అందిస్తుంది.
NewsMinute24 రేటింగ్: 3/5
