Tamilnadu: తమిళనాడు రాజకీయాల్లో ఆసక్తికర చర్చకు తెరలేచింది. ముఖ్యమంత్రి, తమిళగ వెట్రి కళగం (టీవీకే) అధినేత విజయ్ మాజీ భార్య సంగీత సోర్నలింగం బీజేపీలో చేరనున్నారనే ప్రచారం రాజకీయ వర్గాల్లో హాట్ టాపిక్గా మారింది. అయితే ఈ వార్తలపై ఇప్పటివరకు బీజేపీ గానీ, సంగీత గానీ ఎలాంటి అధికారిక ప్రకటన చేయలేదు.
సినీ నటుడిగా అపార ప్రజాదరణ సంపాదించిన విజయ్, రాజకీయాల్లోనూ తనదైన ముద్ర వేస్తున్నారు. ఈ నేపథ్యంలో ఆయన రాజకీయ ప్రభావాన్ని ఎదుర్కొనే వ్యూహంలో భాగంగానే సంగీతను బీజేపీలోకి తీసుకురావాలని ఆ పార్టీ ప్రయత్నిస్తోందనే వార్తలు చెన్నై రాజకీయ వర్గాల్లో వినిపిస్తున్నాయి. కొన్ని మీడియా కథనాల ప్రకారం ప్రస్తుతం బీజేపీలో ఉన్న ఓ ప్రముఖ సినీ నటి ద్వారా సంగీతతో సంప్రదింపులు జరుగుతున్నట్లు ప్రచారం సాగుతోంది.
మరోవైపు విజయ్, సంగీత మధ్య విడాకుల వ్యవహారం కోర్టు పరిధిలో ఉన్న నేపథ్యంలో ఈ ప్రచారానికి మరింత ప్రాధాన్యం ఏర్పడింది. ఇటీవలి కాలంలో వారి వ్యక్తిగత జీవితానికి సంబంధించిన అంశాలు కూడా రాజకీయ చర్చల్లో చోటు చేసుకుంటున్నాయి.
అయితే రాజకీయ విశ్లేషకుల అభిప్రాయం ప్రకారం ప్రస్తుతం వెలువడుతున్న సమాచారం అంతా ఊహాగానాల స్థాయిలోనే ఉంది. అధికారిక ప్రకటన వెలువడే వరకు సంగీత రాజకీయ ప్రవేశం లేదా బీజేపీలో చేరికపై స్పష్టత వచ్చే అవకాశం లేదని వారు పేర్కొంటున్నారు.
ప్రస్తుతం తమిళనాడు రాజకీయాల్లో ఈ అంశం చర్చనీయాంశంగా మారగా, రానున్న రోజుల్లో దీనిపై మరిన్ని పరిణామాలు వెలుగులోకి వచ్చే అవకాశం ఉందని రాజకీయ వర్గాలు భావిస్తున్నాయి.
