National:
M. Upendra Reddy ✍🏽
ఏబీవీపీకి ఐదు స్థానాలు.. ప్రాంతీయ ఐక్యతపై కొత్త ప్రశ్నలు! కేంద్రానికి అనుకూల సంకేతమా? లడఖ్ రాజకీయాల్లో మారుతున్న సమీకరణాలకు విశ్వవిద్యాలయ ఎన్నికలు అద్దం పడుతున్నాయా?…
లడఖ్.. ప్రకృతి అందాలకు మాత్రమే కాదు, ప్రత్యేక రాజకీయ అస్తిత్వం కోసం సాగుతున్న పోరాటానికి కూడా చిరునామాగా మారిన ప్రాంతం. జమ్మూకశ్మీర్‌ పునర్వ్యవస్థీకరణ అనంతరం కేంద్రపాలిత ప్రాంతంగా అవతరించిన లడఖ్‌లో ప్రజాస్వామ్య హక్కులు, స్వయంపాలన, రాజ్యాంగ రక్షణలు, స్థానికుల భవిష్యత్తు వంటి అంశాలు రాజకీయ చర్చల్లో కీలకంగా మారాయి. ఇలాంటి తరుణంలో యూనివర్సిటీ ఆఫ్‌ లడఖ్ విద్యార్థి సంఘ ఎన్నికల ఫలితాలు కొత్త రాజకీయ చర్చకు తెరలేపాయి. అఖిల భారతీయ విద్యార్థి పరిషత్‌ (ఏబీవీపీ) ఐదు స్థానాలను కైవసం చేసుకోవడం ప్రాంతీయ రాజకీయ వర్గాలను ఆశ్చర్యానికి గురిచేసింది. ఈ ఫలితాలు కేవలం విద్యార్థి సంఘ ఎన్నికలకే పరిమితమా? లేక లడఖ్ రాజకీయాల్లో మారుతున్న అభిప్రాయాలకు సంకేతమా? అన్న ప్రశ్నలు ఇప్పుడు ప్రాధాన్యం సంతరించుకున్నాయి.
ఐదింటిపై ఏబీవీపీ పట్టు…
యూనివర్సిటీ ఆఫ్‌ లడఖ్‌లోని లేహ్‌ క్యాంపస్‌ విద్యార్థి సంఘ ఎన్నికల్లో మొత్తం ఎనిమిది స్థానాలకు గాను ఐదు స్థానాలను ఏబీవీపీ గెలుచుకుంది. దావా నామ్‌గ్యాల్‌ అధ్యక్షుడిగా, త్సెరింగ్‌ యాంగ్‌డోల్‌ ఉపాధ్యక్షురాలిగా, స్టాంజిన్‌ రిగ్‌జోల్‌ ప్రధాన కార్యదర్శిగా ఎన్నికయ్యారు. రబ్స్కిట్‌ డోల్మా సంయుక్త కార్యదర్శిగా, టెన్జిన్‌ త్సేవాంగ్‌ క్రీడల కార్యదర్శిగా విజయం సాధించారు. మిగిలిన మూడు స్థానాల్లో ఏబీవీపీకి చెందని అభ్యర్థులు గెలుపొందారు.
ఈ ఫలితాన్ని ఏబీవీపీ తన సంస్థాగత బలానికి నిదర్శనంగా అభివర్ణిస్తోంది. విద్యార్థుల సంక్షేమం, విద్యా అభివృద్ధి, జాతీయ సమైక్యత పట్ల యువతకు తమపై విశ్వాసం పెరిగిందని పేర్కొంటోంది. మరోవైపు, కేంద్ర ప్రభుత్వ పెద్దలు సైతం ఈ విజయాన్ని రాజకీయంగా ప్రాధాన్యమున్న పరిణామంగా అభివర్ణించడం గమనార్హం.
ప్రాంతీయ నేతలకు ఎందుకీ ఆశ్చర్యం?
లడఖ్‌కు మరిన్ని హక్కులు, స్వయంపాలన కల్పించాలంటూ ఉద్యమిస్తున్న వర్గాలకు ఈ ఫలితాలు ఊహించని పరిణామంగా మారాయి. లేహ్‌ అపెక్స్‌ బాడీ చైర్మన్‌ చెరింగ్‌ దోర్జే లక్రూక్‌ ఎన్నికల ఫలితాలపై ఆశ్చర్యం వ్యక్తం చేశారు. కొందరు విద్యార్థి నాయకులను ప్రలోభపెట్టి ఉండవచ్చని ఆయన ఆరోపించారు. అయితే ఈ ఆరోపణలకు సంబంధించి స్వతంత్రంగా నిర్ధారణ అయిన ఆధారాలు బయటకు రాలేదు. ఏబీవీపీ నాయకత్వం సైతం ఈ ఆరోపణలను తోసిపుచ్చింది. ఎన్నికల ప్రక్రియ సక్రమంగానే జరిగిందని స్పష్టం చేసింది.
మాజీ విద్యార్థి సంఘ అధ్యక్షుడు స్టాంజిన్‌ కున్సాల్‌ కూడా కొందరు అభ్యర్థులు ఎన్నికల అనంతరం ఏబీవీపీ వైపు వెళ్లినట్లు తనకు తెలిసిందని వ్యాఖ్యానించారు. ప్రతిపక్ష ఓట్లు పలువురి మధ్య చీలిపోవడం కూడా ఫలితాలపై ప్రభావం చూపి ఉండవచ్చని అభిప్రాయపడ్డారు.
ఇక్కడ గమనించాల్సిన విషయం ఒక్కటే. రాజకీయ ఆరోపణలు ఒకవైపు, ఎన్నికల ద్వారా వెల్లడైన ఫలితాలు మరోవైపు ఉన్నాయి. ప్రలోభాల ఆరోపణలను నిజాలుగా పరిగణించలేం. అదే సమయంలో ఫలితాలను పూర్తిస్థాయిలో ప్రజాభిప్రాయంగా కూడా చూడలేం.
కేంద్రానికి అస్త్రం…
ఏబీవీపీ విజయాన్ని కేంద్ర హోంమంత్రి అమిత్‌షా, కేంద్ర మంత్రి నితిన్‌ గడ్కరీ అభినందించడం ఈ పరిణామానికి జాతీయ రాజకీయ ప్రాధాన్యాన్ని తీసుకొచ్చింది. యువత జాతీయవాదానికి మద్దతు పలికారని, విభజనవాద శక్తులకు ఇది గట్టి సమాధానమని అమిత్‌షా వ్యాఖ్యానించారు. జాతీయ ఐక్యత, దేశ నిర్మాణంపై యువత విశ్వాసానికి ఈ ఫలితాలు ప్రతిబింబమని గడ్కరీ పేర్కొన్నారు.
అయితే విద్యార్థి సంఘ ఎన్నికల్లో ఒక సంస్థ విజయం సాధించడాన్ని మొత్తం ప్రాంత ప్రజల రాజకీయ వైఖరిగా చిత్రీకరించడం ఎంతవరకు సమంజసం? ఇదే ఇప్పుడు చర్చించాల్సిన కీలక అంశం. విశ్వవిద్యాలయ ఎన్నికల్లో విద్యార్థులు విద్య, ఉపాధి, క్యాంపస్‌ సమస్యలు, నాయకత్వ సామర్థ్యం వంటి అంశాలను కూడా ప్రాతిపదికగా తీసుకుని ఓటు వేసి ఉండవచ్చు. కాబట్టి ఈ ఫలితాలను కేంద్ర ప్రభుత్వ విధానాలకు సంపూర్ణ ఆమోదంగా భావించడం రాజకీయ అతివ్యాఖ్యానమే అవుతుంది.
అంతర్గత విభేదాలా?
2019లో జమ్మూకశ్మీర్‌ పునర్వ్యవస్థీకరణతో లడఖ్ ప్రత్యేక కేంద్రపాలిత ప్రాంతంగా ఏర్పడింది. అయితే శాసనసభ లేకుండా కేంద్ర పాలనలో కొనసాగుతున్న ఈ ప్రాంతంలో స్థానిక ప్రజాప్రతినిధులకు మరింత అధికారాలు కల్పించాలనే డిమాండ్‌ బలపడింది. భూమి, ఉద్యోగాలు, సంస్కృతి, స్థానిక వనరుల పరిరక్షణ, రాజ్యాంగ భద్రతల కోసం లేహ్‌, కార్గిల్‌ ప్రాంతాలకు చెందిన పలు సంఘాలు ఉద్యమించాయి.
లేహ్‌ అపెక్స్‌ బాడీ, కార్గిల్‌ డెమోక్రటిక్‌ అలయన్స్‌ ఈ ఉద్యమంలో కీలక పాత్ర పోషిస్తున్నాయి. సోనం వాంగ్‌చుక్‌ వంటి ఉద్యమకారుల ఆందోళనలు జాతీయస్థాయిలోనూ చర్చనీయాంశమయ్యాయి. గతంలో జరిగిన నిరసనలు, పోలీసు కాల్పుల్లో ప్రాణనష్టం, కేంద్రంతో చర్చల్లో ఏర్పడిన ప్రతిష్టంభన ఈ ప్రాంత రాజకీయ వాతావరణాన్ని మరింత సంక్లిష్టంగా మార్చాయి.
ఇటీవలి కాలంలో కేంద్రం ప్రతిపాదించిన రాజ్యాంగ రక్షణలు, ఎన్నికైన ప్రాంతీయ సంస్థ అధికారాల విషయంలోనూ విభేదాలు కొనసాగుతున్నాయి. స్థానిక నేతలు కోరుతున్న అధికారాలు, కేంద్రం ప్రతిపాదిస్తున్న పరిపాలనా వ్యవస్థ మధ్య అంతరం ఇంకా పూర్తిగా తొలగిపోలేదు.
ఈ నేపథ్యంలో విద్యార్థి ఎన్నికల ఫలితాలు ప్రాంతీయ ఉద్యమంలో ఐక్యత ఎంత బలంగా ఉందన్న ప్రశ్నను ముందుకు తెస్తున్నాయి. ఉద్యమానికి మద్దతు ఉందని భావిస్తున్న వర్గాలు యువతలో తమ రాజకీయ ప్రభావాన్ని మరోసారి అంచనా వేసుకోవాల్సిన పరిస్థితి ఏర్పడింది.
తక్కువగా చూడలేం.. అతిగా అర్థం చేసుకోలేం!
ఈ ఎన్నికల ఫలితాలను ఉద్యమకారులు తేలిగ్గా కొట్టిపారేయడం సరికాదు. అదే సమయంలో కేంద్రం కూడా దీనిని తన రాజకీయ విజయంగా మాత్రమే ప్రచారం చేసుకోవడం సముచితం కాదు. యువతలో భిన్నమైన అభిప్రాయాలు ఉండటం ప్రజాస్వామ్య సహజ లక్షణం. ఒక ప్రాంతంలో స్వయంపాలన కోరే వ్యక్తి జాతీయ సమైక్యతకు వ్యతిరేకి కావాల్సిన అవసరం లేదు. అలాగే జాతీయవాద భావజాలానికి మద్దతు ఇచ్చే విద్యార్థి స్థానిక హక్కులను కోరుకోడని అనుకోవడం కూడా పొరపాటే.
ప్రాంతీయ ఉద్యమాల్లో రాజకీయ పార్టీల పాత్ర, నాయకత్వ పోటీ, ఓట్ల చీలిక, యువతలో మారుతున్న ఆలోచనా ధోరణులు ప్రభావం చూపుతుంటాయి. లడఖ్‌లోనూ అదే పరిస్థితి కనిపిస్తోందా అన్నది రానున్న రోజుల్లో స్పష్టమవుతుంది.
అసలు సవాలు!
లడఖ్ భవిష్యత్తును నిర్ణయించేది ఒక విశ్వవిద్యాలయ ఎన్నికల ఫలితం కాదు. అక్కడి ప్రజలకు ఎంతమేర ప్రజాస్వామ్య అధికారం లభిస్తుంది? స్థానిక భూములు, ఉద్యోగాలు, సంస్కృతి, సంప్రదాయాలకు ఎలాంటి రాజ్యాంగ రక్షణలు ఉంటాయి? ఎన్నికైన ప్రతినిధులకు పరిపాలనపై ఎంత నియంత్రణ ఉంటుంది? కేంద్రం, స్థానిక సంఘాల మధ్య చర్చలు ఏ దిశగా సాగుతాయి? అన్న అంశాలే అసలు పరీక్ష.
సున్నితమైన సరిహద్దు ప్రాంతమైన లడఖ్‌లో ప్రజల విశ్వాసాన్ని గెలుచుకోవడం దేశ భద్రతకు కూడా అత్యంత కీలకం. అందుకు రాజకీయ భిన్నాభిప్రాయాలను అణచివేయడం కాకుండా, వాటికి ప్రజాస్వామ్య పరిష్కారాలు చూపించాలి.
ఎబివిపి విజయం లడఖ్ రాజకీయాల్లో ఒక ముఖ్యమైన సంకేతం కావచ్చు. కానీ అది హక్కుల ఉద్యమానికి ముగింపు పలికిందని చెప్పడానికి ఆధారం కాదు. ప్రాంతీయ ఐక్యతలో బలహీనతలు బయటపడ్డాయా? యువతలో కొత్త రాజకీయ ఆలోచనలు మొదలయ్యాయా? అన్నది ఆత్మపరిశీలన చేసుకోవాల్సిన సమయం. ఎన్నికల విజయాన్ని ఎవరైనా తమకు అనుకూలంగా మలుచుకోవచ్చు. కానీ ప్రజల ఆకాంక్షలకు పరిష్కారం చూపినప్పుడే నిజమైన రాజకీయ విజయం లభిస్తుంది. లడఖ్ కోరుకుంటున్నది నినాదాల యుద్ధం కాదు.. తమ భవిష్యత్తును తామే నిర్ణయించుకునే ప్రజాస్వామ్య భరోసా!
