Telangana:
newsminute24/ Vinod ✍🏽✍🏽✍🏽
తెలంగాణ రాజకీయాల్లో అధికార కాంగ్రెస్ పార్టీకి సీపీఐ మిత్రపక్షంగా కొనసాగుతోంది. రాష్ట్రస్థాయిలో రెండు పార్టీల మధ్య సఖ్యత కనిపిస్తున్నప్పటికీ.. క్షేత్రస్థాయిలో మాత్రం పరిస్థితులు భిన్నంగా కనిపిస్తున్నాయి. ముఖ్యంగా ఉమ్మడి ఖమ్మం జిల్లా కొత్తగూడెం రాజకీయాలు ఇప్పుడు చర్చనీయాంశంగా మారాయి. సీపీఐ రాష్ట్ర కార్యదర్శి, కొత్తగూడెం ఎమ్మెల్యే కూనంనేని సాంబశివరావు చేస్తున్న వ్యాఖ్యలు కాంగ్రెస్–సీపీఐ మధ్య ఉన్న అంతర్గత విభేదాలను మరోసారి తెరపైకి తెచ్చాయి.
కొత్తగూడెం నియోజకవర్గంలో కాంగ్రెస్ నాయకులు, కార్యకర్తల నుంచి తమకు ఆశించిన స్థాయిలో సహకారం అందడం లేదని కూనంనేని అసంతృప్తి వ్యక్తం చేస్తున్నారు. కాంగ్రెస్ నేతలు, కేడర్ పూర్తి సహకారం అందించకపోయినా.. తాను మాత్రం అందరితో మంచిగానే ఉంటానని వ్యాఖ్యానించడం రాజకీయంగా ప్రాధాన్యత సంతరించుకుంది. నామినేటెడ్ పదవులు, స్థానిక ప్రాధాన్యత విషయంలో కాంగ్రెస్ నేతలు తమ వారికే ప్రాధాన్యత ఇవ్వాలని పట్టుబడుతున్నారనే అభిప్రాయం సీపీఐ వర్గాల్లో ఉన్నట్లు కథనాలు పేర్కొంటున్నాయి.
మరోవైపు మంత్రి పొంగులేటి శ్రీనివాసరెడ్డి వ్యవహారం కూడా కొత్తగూడెం రాజకీయాల్లో చర్చకు దారితీస్తోంది. జిల్లాకు చెందిన మంత్రులు, ముఖ్యమంత్రి రేవంత్ రెడ్డితో తనకు సాన్నిహిత్యం ఉందని కూనంనేని చెబుతూనే.. పొంగులేటితో మాత్రం కొంత గ్యాప్ ఉందని అంగీకరించారు. కొత్తగూడెం నియోజకవర్గంలో మంత్రి జోక్యం, పర్యటనలు, స్థానిక రాజకీయాలపై ఆయన గతంలోనూ అసంతృప్తి వ్యక్తం చేశారు.
ప్రభుత్వ కార్యక్రమాలు, అధికారిక సమావేశాలు, అభివృద్ధి పనుల్లో తమకు తగిన ప్రాధాన్యత లభించడం లేదనే భావన సీపీఐ వర్గాల్లో ఉన్నట్లు తెలుస్తోంది. అధికారంలో మిత్రపక్షంగా ఉన్నప్పటికీ స్థానికంగా మాత్రం సమన్వయం కొరవడుతోందనే చర్చ సాగుతోంది. దీంతో కాంగ్రెస్, సీపీఐ నాయకుల మధ్య దూరం పెరుగుతోందా అనే ప్రశ్నలు ఉత్పన్నమవుతున్నాయి.
ఇదిలా ఉంటే రాబోయే ఎమ్మెల్సీ ఎన్నికలు కాంగ్రెస్–సీపీఐ సంబంధాలకు కీలకంగా మారనున్నాయి. పొత్తుపై కాంగ్రెస్‌తో చర్చలు జరిగినప్పటికీ కూనంనేని స్పష్టమైన హామీ ఇవ్వలేదు. పార్టీ కౌన్సిల్ సమావేశం అనంతరం తుది నిర్ణయం ప్రకటిస్తామని వెల్లడించారు. దీంతో సీపీఐ మద్దతు కాంగ్రెస్‌కు కొనసాగుతుందా? లేక రాజకీయంగా కొత్త నిర్ణయం తీసుకుంటుందా? అనే ఆసక్తి నెలకొంది.
మొత్తానికి రాష్ట్రస్థాయిలో మిత్రపక్షాలుగా ఉన్న కాంగ్రెస్, సీపీఐ మధ్య కొత్తగూడెంలో మాత్రం రాజకీయ విభేదాలు చర్చనీయాంశంగా మారాయి. పదవుల పంపకం నుంచి ప్రోటోకాల్ వరకు.. స్థానిక నాయకత్వం నుంచి మంత్రుల జోక్యం వరకు అనేక అంశాలు రెండు పార్టీల మధ్య దూరాన్ని పెంచుతున్నాయనే విశ్లేషణలు వినిపిస్తున్నాయి. మరి ఈ విభేదాలకు పార్టీ పెద్దలు పరిష్కారం చూపుతారా? ఎమ్మెల్సీ ఎన్నికల నాటికి పొత్తు విషయంలో స్పష్టత వస్తుందా? అన్నది వేచి చూడాలి.
