Telangana: భూతాప ప్రమాద ఘంటికలు మోగుతున్న ఈ తరుణంలో దేశీయ విత్తనాల అభివృద్ధి పరుచుకోవడమే పరిష్కారమని ప్రముఖ రాజకీయ ఆర్థిక విశ్లేషకులు మోహన్ గురుస్వామి అన్నారు. కౌన్సిల్ ఫర్ గ్రీన్ రెవల్యూషన్ సీజీఆర్ & భారత్ బీజ్ స్వరాజ్ మంచ్ సంయుక్త ఆధ్వర్యంలో కడ్తాల్ మండలం, అన్మాస్ పల్లిలో నిర్వహిస్తున్న విత్తన పండుగ సందర్భంగా ముఖ్య అతిథిగా పాల్గొని ఆయన ప్రసంగించారు. భూతాపం రోజురోజుకు పెరుగుతున్న ఈ క్రమంలో ఒక డిగ్రీ సెంటీగ్రేట్ ఉష్ణోగ్రత పెరిగినట్లయితే 15 నుంచి 20 శాతం ఆహార ఉత్పత్తి తగ్గుతుందని హెచ్చరించారు. గడిచిన 50 సంవత్సరాలను పరిశీలించినట్లయితే వ్యవసాయంలో అనేక మార్పులు వచ్చాయని.. గతంలో ఉన్న 1,20,000 వరి రకాల స్థానంలో కేవలం నేడు 3000 రకాల విత్తనాలు మాత్రమే అందుబాటులో ఉన్నాయని తెలిపారు.సువాసన భరిత చిట్టి ముత్యాలు లాంటి వరి వంగడాలు కనుమరుగయ్యాయని ఆయన ఆందోళన వ్యక్తం చేశారు. విత్తనాభివృద్ధి పట్ల కృషి జరగడం లేదని, విత్తన పరిశోధనకు అవసరమైన చర్యలు తీసుకోవడానికి క్యాబినెట్ సబ్ కమిటీ ఏర్పాటు చేయాలని ప్రభుత్వాని కోరారు.రామ మందిరం, కంచ గచ్చిబౌలి, వక్త్ బోర్డ్ అంశాల పట్ల ఉన్న శ్రద్ధ రైతులు, వాతావరణం, విత్తనాల అభివృద్ధి ప్రభుత్వాలకు పట్టకపోవడం శోచనీయమని మోహన్ గురుస్వామి దుయ్యబట్టారు.
గాంధీ గ్లోబల్ ఫ్యామిలీ సంస్థ గున్న రాజేందర్ రెడ్డి సీజీఆర్ సంస్థను ఏర్పాటు చేసి తెలంగాణలో కొన్ని కోట్ల మొక్కలను నాటరాని మోహన్ గురుస్వామి కొనియాడారు . ప్రపంచీకరణ కారణంగా వ్యవసాయం, దేశీయఆవులు తగ్గాయని గుర్తుచేశారు.తూర్పు కొండల పశువుల పాల ఉత్పత్తులతో మానవుల ఆరోగ్యం మెరుగవుతుందన్నారు. తెలంగాణ రాష్టంలో భూములలో వానపాములు తగ్గడం వల్ల భూసారం తగ్గి రైతుల ఆత్మహత్యలు పెరిగాయని,సిజిఆర్ సంస్థల విత్తనాలతో విప్లవాత్మకమైన మార్పును వ్యవసాయంలో తీసుకురావాలన్నారు . స్వదేశి ఆహారంతో కాన్సర్, షుగర్ వివిధ రోగాలకు నివారణ చేస్తే విధంగా సహకారం అందిస్తామని మోహన్ గురుస్వామి చెప్పుకొచ్చారు.అనంతరం CGR వ్యవస్థాపకులు కె. లక్ష్మా రెడ్డి మాట్లాడుతూ..
తెలంగాణ వార్షిక విత్తనాల పండుగ కార్యక్రమంలో భాగంగా వర్క్ షాప్ ను కూడా నిర్వహిస్తున్నట్లు తెలిపారు. ఆదివారం ఈ కార్యక్రమం ముగిస్తుందని..విత్తనాల పండుగలో జరగబోయే కార్యాచరణ కమిటి ద్వారా తీర్మానాల్లో మోహన్ గురు స్వామి చెప్పిన సూచనలు ప్రవేశ పెడుతామని వివరించారు. ఈ కార్యక్రమంలో సభాధ్యక్షులుగా మాజీ ఆర్టీఐ కమిషనర్ ఆర్. దిలీప్ రెడ్డి. సీఎం రేవంత్ రెడ్డి మామ పద్మ రెడ్డి,రైతులు,విద్యార్థులు, ప్రొఫెసర్లు, మేధావులు, సైంటిస్టులు,డాక్టర్లు తదితరులు పాల్గొన్నారు.
