National:
ప్రపంచ దేశాల దృష్టిని తెలంగాణ వైపు మళ్లించేలా భారత్ సమ్మిట్–2026కు హైదరాబాద్ వేదిక కానుంది. ముఖ్యమంత్రి రేవంత్‌రెడ్డి నాయకత్వంలో రాష్ట్ర ప్రభుత్వం ప్రతిష్ఠాత్మకంగా నిర్వహిస్తున్న ఈ సదస్సు నవంబర్ 12 నుంచి 14 వరకు హైటెక్స్‌లో జరగనుంది. సుమారు 100 దేశాల నుంచి 450 మంది అంతర్జాతీయ ప్రతినిధులు హాజరుకానుండటం విశేషం. ‘తెలంగాణ రైజింగ్’ లక్ష్యాలను ప్రపంచానికి పరిచయం చేయడం, అంతర్జాతీయ పెట్టుబడులను ఆకర్షించడం, అభివృద్ధి భాగస్వామ్యాలను బలోపేతం చేయడం ఈ సదస్సు ప్రధాన ఉద్దేశం. ప్రజాస్వామ్యం, సామాజిక న్యాయం, సమానత్వం, యువతకు ఉపాధి వంటి అంశాలపై చర్చలకు ప్రాధాన్యత ఇవ్వనున్నారు. ఈ సమ్మిట్ ద్వారా తెలంగాణకు ప్రపంచ స్థాయి గుర్తింపుతో పాటు రాష్ట్ర ప్రగతికి కొత్త అవకాశాలు అందుబాటులోకి రానున్నాయి.
తెలంగాణను అన్ని రంగాల్లో అభివృద్ధిలో అగ్రగామిగా నిలపాలన్న లక్ష్యంతో ప్రభుత్వం చేపడుతున్న ‘తెలంగాణ రైజింగ్’ కార్యక్రమం రాష్ట్ర భవిష్యత్తుకు కొత్త దిశానిర్దేశం చేయనుంది. పారిశ్రామిక ప్రగతి, పెట్టుబడుల ఆకర్షణ, యువతకు ఉపాధి, మహిళా సాధికారత, రైతుల సంక్షేమం, సామాజిక న్యాయానికి సమ ప్రాధాన్యతనిస్తూ సమ్మిళిత అభివృద్ధి సాధించడమే ప్రభుత్వ సంకల్పం. భారత్ సమ్మిట్ వేదికగా తెలంగాణలోని పెట్టుబడి అవకాశాలు, మౌలిక సదుపాయాలు, పారిశ్రామిక విధానాలను అంతర్జాతీయ ప్రతినిధులకు పరిచయం చేయనున్నారు. టీపీసీసీ అధ్యక్షులు ఎమ్మెల్సీ మహేష్ కుమార్ గౌడ్,మంత్రి దుద్దిళ్ల శ్రీధర్‌బాబు ఆధ్వర్యంలో సాగుతున్న ఏర్పాట్లు రాష్ట్ర ప్రాధాన్యతను చాటుతున్నాయి. ఐటీ, ఫార్మా, బయోటెక్నాలజీ, గ్రీన్ ఎనర్జీ, తయారీ రంగాల్లో అంతర్జాతీయ భాగస్వామ్యాలు పెరిగితే పెట్టుబడులతో పాటు స్థానిక యువతకు నైపుణ్యాభివృద్ధి, ఉపాధి అవకాశాలు మెరుగుపడనున్నాయి. తద్వారా తెలంగాణను ప్రపంచ స్థాయి పెట్టుబడుల గమ్యస్థానంగా తీర్చిదిద్దే లక్ష్యానికి బలం చేకూరనుంది.
ఐటీ, ఫార్మా, వైద్య, విద్యా రంగాల్లో ఇప్పటికే ప్రత్యేక గుర్తింపు పొందిన హైదరాబాద్.. భారత్ సమ్మిట్‌తో అంతర్జాతీయ విధాన చర్చలకు వేదికగా నిలవనుంది. ముఖ్యమంత్రి రేవంత్‌రెడ్డి నాయకత్వంలోని ప్రభుత్వం పెట్టుబడులు, పారిశ్రామికాభివృద్ధి, ఆధునిక మౌలిక సదుపాయాలకు ప్రాధాన్యతనిస్తోంది. ఈ సమ్మిట్ ద్వారా ప్రపంచ పెట్టుబడిదారులతో కొత్త భాగస్వామ్యాలు, రాష్ట్రానికి మరిన్ని పెట్టుబడులు, యువతకు ఉపాధి అవకాశాలు లభించే మార్గం సుగమం కానుంది. తద్వారా ప్రపంచ పటంలో తెలంగాణ ఖ్యాతి మరింత పెరగనుంది.
అభివృద్ధి అంటే కేవలం ఆర్థిక వృద్ధి, పారిశ్రామిక విస్తరణ, పెట్టుబడుల ఆకర్షణ మాత్రమే కాదు.. సమాజంలోని ప్రతి వర్గానికి అభివృద్ధి ఫలాలు సమానంగా అందినప్పుడే నిజమైన ప్రగతి సాధ్యమవుతుంది. ప్రజాస్వామ్య విలువల పరిరక్షణ, సామాజిక–ఆర్థిక న్యాయం, సమాఖ్య స్ఫూర్తి, లింగ సమానత్వం, పర్యావరణ పరిరక్షణ వంటి కీలక అంశాలకు ప్రాధాన్యతనిస్తూ నిర్వహించనున్న భారత్ సమ్మిట్ ప్రత్యేకతను చాటనుంది. అణగారిన వర్గాలకు సముచిత అవకాశాలు, మహిళలకు సమాన హక్కులు, యువతకు ఉపాధి, రైతులకు భరోసా, పేదలకు సంక్షేమం అందించడమే ప్రజాస్వామ్య పాలనకు అసలైన నిర్వచనం. కాంగ్రెస్ ప్రభుత్వం ప్రతిపాదిస్తున్న సామాజిక న్యాయం, సమాన అవకాశాలు, ప్రజాకేంద్రీకృత అభివృద్ధి విధానాలను అంతర్జాతీయ వేదికపై చాటిచెప్పేందుకు ఈ సదస్సు కీలక వేదికగా నిలవనుంది. ముఖ్యమంత్రి రేవంత్‌రెడ్డి నాయకత్వంలో తెలంగాణలో అభివృద్ధి, సంక్షేమాన్ని సమతుల్యంగా ముందుకు తీసుకెళ్తున్న ప్రభుత్వ విధానాలను ప్రపంచానికి పరిచయం చేసే గొప్ప అవకాశంగా భారత్ సమ్మిట్ నిలవనుంది.
భారత్ సమ్మిట్–2026 తెలంగాణ అభివృద్ధి లక్ష్యాలతో పాటు అంతర్జాతీయ స్థాయిలో ప్రజాస్వామ్య విలువలు, సామాజిక సమానత్వం, మానవ హక్కులు, పర్యావరణ పరిరక్షణపై చర్చలకు వేదిక కానుంది. జాతీయ కాంగ్రెస్ నాయకులు, రాష్ట్ర ప్రభుత్వ ప్రతినిధుల భాగస్వామ్యం ఈ సదస్సుకు రాజకీయ, విధానపరమైన ప్రాధాన్యతను తీసుకురానుంది. ప్రపంచ ప్రగతిశీల రాజకీయ శక్తుల మధ్య ఆలోచనల మార్పిడి, విధానపరమైన సహకారాన్ని పెంపొందించడంతో పాటు అంతర్జాతీయ సమన్వయం కోసం థింక్‌ట్యాంక్ ఏర్పాటు ప్రతిపాదన కూడా కీలకంగా నిలవనుంది. ఈ వేదిక ద్వారా తెలంగాణ ప్రపంచ ప్రజాస్వామ్య చర్చల్లో తన భాగస్వామ్యాన్ని విస్తరించుకునే అవకాశం ఉంది.
సమ్మిట్‌లో ఏర్పాటు చేయనున్న ‘ఇండియా అండ్ ది వరల్డ్’ ప్రదర్శన భారత ప్రజాస్వామ్య, రాజకీయ చరిత్రను ప్రపంచ ప్రతినిధులకు పరిచయం చేయనుంది. కాంగ్రెస్ పార్టీ 140 ఏళ్ల ప్రస్థానంతో పాటు సమాచార హక్కు చట్టం, ఉపాధి హామీ పథకం, విద్యా హక్కు చట్టం వంటి ప్రజలకు హక్కులు కల్పించిన విధానాల ప్రాధాన్యతను ఈ ప్రదర్శన ద్వారా వివరించనున్నారు. స్వాతంత్ర్య ఉద్యమ వారసత్వం నుంచి సామాజిక న్యాయం, ప్రజాసంక్షేమం దిశగా సాగిన భారత ప్రయాణాన్ని భవిష్యత్తు అభివృద్ధి ఆలోచనలతో అనుసంధానించడం ఈ ప్రదర్శన ప్రత్యేకతగా నిలవనుంది.
అంతర్జాతీయ సదస్సును రాజకీయ కోణంలో కాకుండా రాష్ట్ర ప్రయోజనాల దృష్టితో చూడాలి. రాజకీయ భిన్నాభిప్రాయాలు ప్రజాస్వామ్యంలో సహజమైనప్పటికీ, తెలంగాణకు లభించిన ప్రపంచస్థాయి అవకాశాలు అభివృద్ధికి బాటలు వేయాలన్నది ప్రధాన లక్ష్యం కావాలి. ప్రపంచ దేశాలతో సంబంధాల బలోపేతం, పెట్టుబడులు, సాంకేతిక భాగస్వామ్యాలు, పర్యాటక రంగ విస్తరణ ద్వారా రాష్ట్ర ఆర్థిక ప్రగతికి కొత్త అవకాశాలు అందిపుచ్చుకోవాలి. భారత్ సమ్మిట్‌ను ప్రభుత్వ కార్యక్రమానికే పరిమితం చేయకుండా, తెలంగాణ భవిష్యత్తుకు ఉపయోగపడే వేదికగా మలిచేందుకు అన్ని రాజకీయ పక్షాలు నిర్మాణాత్మక సహకారం అందించాలి. రాజకీయాలకు అతీతంగా రాష్ట్ర ప్రయోజనాలే ప్రాధాన్యంగా నిలవాలి.
ఏ అంతర్జాతీయ సదస్సుకైనా అసలైన విజయం దాని ద్వారా సాధించే ఫలితాల్లోనే ఉంటుంది. భారత్ సమ్మిట్ ద్వారా వచ్చే పెట్టుబడులు పరిశ్రమల విస్తరణకు, యువతకు ఉద్యోగ అవకాశాలకు, మహిళల ఆర్థిక స్వావలంబనకు దోహదపడాలి. ఐటీ, ఫార్మా, గ్రీన్ ఎనర్జీ వంటి రంగాల్లో అంతర్జాతీయ భాగస్వామ్యాలను పెంచుతూ స్థానిక పారిశ్రామికవేత్తలు, గ్రామీణ ప్రాంతాలకు అవకాశాలు కల్పించాలి. పర్యావరణ పరిరక్షణతో పాటు ప్రాంతీయ సమతుల్య అభివృద్ధికి ప్రాధాన్యతనిస్తూ పెట్టుబడుల ఫలాలు అన్ని వర్గాల ప్రజలకు చేరినప్పుడే తెలంగాణ ప్రగతి సుస్థిరమవుతుంది.
భారత్ సమ్మిట్–2026 తెలంగాణ అభివృద్ధికి సరికొత్త బాటలు వేయాలి. ముఖ్యమంత్రి రేవంత్‌రెడ్డి నాయకత్వంలోని కాంగ్రెస్ ప్రభుత్వం ఆకర్షించే అంతర్జాతీయ పెట్టుబడులు పరిశ్రమల విస్తరణకు, యువతకు ఉపాధికి, ప్రజల సంక్షేమానికి దోహదపడాలి. ప్రపంచ వేదికపై తెలంగాణ ఖ్యాతిని చాటడంతో పాటు, అభివృద్ధి ఫలాలను ప్రతి ఇంటికీ చేరవేయడమే ‘తెలంగాణ రైజింగ్’ లక్ష్యానికి నిజమైన సార్థకత
*అమరవాజీ నాగరాజు*
* టీపీసీసీ ప్రెసిడెంట్ పీఆర్ఓ*
