News Delhi:
దేశవ్యాప్తంగా చర్చనీయాంశంగా మారే కీలక తీర్పును సుప్రీంకోర్టు వెలువరించింది. స్వచ్ఛందంగా వ్యభిచార వృత్తిని (వేశ్యావృత్తి) ఎంచుకోవడం నేరం కాదని అత్యున్నత న్యాయస్థానం స్పష్టం చేసింది. వయోజనులు తమ ఇష్టపూర్వకంగా ఈ వృత్తిలో కొనసాగేందుకు రాజ్యాంగబద్ధ హక్కు ఉందని పేర్కొంది.
జస్టిస్ జె.బి. పర్దివాలా, జస్టిస్ ఆర్. మహాదేవన్లతో కూడిన ధర్మాసనం ఈ అంశంపై విచారణ జరిపింది. భారత రాజ్యాంగంలోని ఆర్టికల్ 21 ప్రకారం ప్రతి వ్యక్తికి గౌరవంతో జీవించే హక్కు ఉందని, అదే హక్కు సెక్స్ వర్కర్లకూ వర్తిస్తుందని ధర్మాసనం తేల్చి చెప్పింది.
18 సంవత్సరాలు నిండిన లేదా అంతకంటే ఎక్కువ వయస్సు ఉన్నవారిని వయోజనులుగా పరిగణిస్తారని, అలాంటి వ్యక్తులు స్వచ్ఛందంగా ఈ వృత్తిని ఎంచుకుంటే దాన్ని నేరంగా చూడరాదని కోర్టు స్పష్టం చేసింది.
పోలీసుల వేధింపులపై ఆంక్షలు
స్వచ్ఛందంగా ఈ వృత్తిలో ఉన్న సెక్స్ వర్కర్లను పోలీసులు వేధించడం, అరెస్టు చేయడం లేదా శిక్షించడం చేయరాదని సుప్రీంకోర్టు ఆదేశించింది. అలాగే దాడులు (రైడ్స్) జరిగిన సందర్భాల్లో వారిని బలవంతంగా రెస్క్యూ హోమ్స్ లేదా షెల్టర్ హోమ్స్కు తరలించకూడదని స్పష్టం చేసింది.
సెక్స్ వర్కర్లు కూడా భారత రాజ్యాంగం ప్రకారం సమాన హక్కులు కలిగిన పౌరులేనని, వారి గౌరవం, వ్యక్తిగత గోప్యతను కాపాడాల్సిన బాధ్యత ప్రభుత్వ యంత్రాంగంపై ఉందని ధర్మాసనం పేర్కొంది.
అక్రమ రవాణా, బలవంతపు వ్యభిచారం నేరమే
అయితే వ్యభిచార గృహాలు (బ్రోతెల్స్) నడపడం, ఇతరులను బలవంతంగా ఈ వృత్తిలోకి దించడం, మానవ అక్రమ రవాణా (హ్యూమన్ ట్రాఫికింగ్) చేయడం మాత్రం చట్టరీత్యా నేరమని సుప్రీంకోర్టు స్పష్టం చేసింది.
అదేవిధంగా కండోమ్లు కలిగి ఉండటాన్ని సెక్స్ వర్కర్కు వ్యతిరేకంగా నేరంగా పరిగణించరాదని, వారి వ్యక్తిగత గోప్యతను దెబ్బతీసే విధంగా పోలీసులు వ్యవహరించకూడదని ధర్మాసనం సూచించింది.
సుప్రీంకోర్టు తాజా తీర్పు దేశంలో సెక్స్ వర్కర్ల హక్కులు, గౌరవం, చట్టపరమైన రక్షణపై కీలక మైలురాయిగా భావిస్తున్నారు న్యాయ నిపుణులు.
