T- SAT:
సాంకేతికంగా దూసుకుపోతున్న నేటి యుగంలో టీ-సాట్ ఆధునిక టెక్నాలజీతో తెలంగాణలోని అన్నివర్గాలకు చేరువవడమే కాకుండా, ఒక వరంగా మారింది. ప్రస్తుత కాలంలో అన్ని అంశాలు సాంకేతికతతో ముడిపడి ఉన్న నేపథ్యంలో విద్యార్థులకు, యువతకు, మహిళలకు, రైతులకు ఇలా అందరికీ టీ-సాట్ చేదోడుగా ఉంటుంది. తెలంగాణ సంస్కృతి, సంప్రదాయాలకు పెద్దపీట వేస్తూ రాష్ట్రంలో ఇంటింటికీ దగ్గరవుతుంది. ఆధునికానికి అనుగుణంగా టీ-సాట్ను మరింత అభివృద్ధి చేసేందుకు ప్రభుత్వం ప్రత్యేక దృష్టి పెట్టి దీన్ని అన్ని రంగాల్లో విస్తరించేలా ప్రత్యేక చర్యలు తీసుకొని ప్రోత్సహించడంతో దేశంలోనే నెం.1 ఎడ్యుకేషనల్ నెట్వర్క్గా నిలిచి తెలంగాణ యువతకు దిక్సూచిలా మారింది.
విద్యార్థులకు, యువతకు టీ-సాట్ ప్రత్యేకంగా అందిస్తున్న ‘విద్య’ కార్యక్రమాలు చేయూతలా మారాయి. పోటీ పరీక్షలకు పెద్ద ఎత్తున ఖర్చు పెట్టి కోచింగ్ సెంటర్లకు వెళ్లలేని పేద విద్యార్థులకు టీ-సాట్ ప్రత్యేక యూట్యూబ్ ఛానళ్లు ప్రయోజకరంగా ఉన్నాయి. తెలంగాణలో గత ఏడాది కాలంలో పెద్ద ఎత్తున 55 వేలకు పైగా ఉద్యోగాల భర్తీ ప్రక్రియ చేపట్టడంతో టీ-సాట్ అందిస్తున్న వివిధ సబ్జెక్ట్స్ మెటీరియల్స్ విద్యార్థులకు కరదీపిగా మారాయి. గ్రూప్-1,2,3 ఉద్యోగాలతో పాటు, డీఎస్సీ, టెట్, ఆర్.ఆర్.బి, బ్యాంకింగ్, కేంద్ర ప్రభుత్వ ఎస్ఎస్సీతో పలు పోటీ పరీక్షల కోసం విద్యార్థులందరికీ తోడ్పడేందుకు అనుభవమున్న ఫ్యాకెల్టీచే రూపొందించిన కంటెంట్ను టీ-సాట్ అందించింది. గ్రూప్-1 పరీక్షల కోసం సుమారు 750 గంటల 1200 ఎపిసోడ్స్, గ్రూప్-2 పరీక్షల కోసం 245 గంటల 300 ఎపిసోడ్స్, గ్రూప్-3 పరీక్షలకు 150 గంటల 300 ఎపిసోడ్స్లలోనే మెటీరియల్ అందించడమే కాకుండా ప్రత్యేకంగా క్రాష్ కోర్సు రూపంలోనూ కంటెంట్ అందించి విద్యార్థుల మన్ననలు పొందింది.
తెలంగాణ ప్రభుత్వం గత ఏడాది కాలంలోనే గ్రూప్ పరీక్షలతో పాటు టెట్, బీఎడ్, డీఎడ్, పరీక్షలను కూడా పెద్ద ఎత్తున నిర్వహించడంతో టీ-సాట్ విద్యార్థులకు ప్రత్యేక కంటెంట్ను అందించింది. టెట్ పరీక్ష కోసం 105 గంటలకు సంబంధించి 199 పాఠ్యాంశాలను, డీఎస్సీ క్రాష్ కోర్సు కోసం 613 గంటలకు సంబంధించి 50 ఎపిసోడ్స్లో నాణ్యమైన కంటెంట్ అందించింది. జనరల్ స్టడీస్పై ‘జనరల్ స్టడీస్ ఫర్ ఆల్’ పేరుతో ప్రత్యేక కార్యక్రమాన్ని టీ-సాట్ ప్రసారం చేస్తుండడంతో పోటీ పరీక్షలకు వెళ్లే యువతకు ప్రయోజకరంగా ఉంది. తెలంగాణలో ప్రతిష్టాత్మకమైన ఉస్మానియా, కాకతీయ విశ్వవిద్యాలయాలతో ఎంఓయూ కుదుర్చుకున్న టీ-సాట్ ఆచార్య ఎన్జీరంగ వ్యవసాయ కళాశాల, తెలంగాణ మహిళా శిశు సంక్షేమ శాఖ మొదలగు వారి సమన్వయంతో డిజిటల్ తరగతులను ప్రారంభించి ప్రసారం చేస్తుంది. మహాత్మాగాంధీ యూనివర్సిటీ సౌజన్యంతో ట్రావెల్ అండ్ టూరీజం మేనేజ్మెంట్ కోర్సుకు ప్రత్యేక పాఠ్యాంశాలను రూపొందించింది. టీ-సాట్, ఫొటానిక్స్, వ్యాలి కార్పొరేషన్ సంయుక్తంగా వీఎల్ఎస్ఐపై వృత్తి నైపుణ్య శిక్షణ అందిస్తున్నాయి.
రాష్ట్రంలో విద్యా వ్యవస్థను పటిష్టపరచాలని కంకణం కట్టుకున్న టీ-సాట్ ఇంటింటికీ నాణ్యమైన విద్యను అందించాలనే గొప్ప లక్ష్యంతో తెలంగాణ ఉన్నత విద్యామండలితో ప్రత్యేక అవగాహన కదుర్చుకుని విద్యార్థులకు పాఠ్యాంశాలు అందించడంలో సాయపడుతుంది. 3వ తరగతి నుండి 8వ తరగతి విద్యార్థుల కోసం 8 గంటల డిజిటల్ పాఠాలను ప్రసారం చేస్తున్న టీ-సాట్ వీరి కోసం 1710 గంటల కంటెంట్ను అందుబాలోకి తెచ్చింది. ఇంటర్మీడియట్ విద్యార్థుల కోసం ప్రతిరోజు 11 ఎపిసోడ్ల డిజిటల్ పాఠాలను ప్రసారం చేస్తూ 2170 గంటల కంటెంట్ను అందుబాటులో ఉంచింది. అన్ని విభాగాలకు అందుబాటులో ఉండేలా ‘స్ఫూర్తి’ కార్యక్రమం ద్వారా స్వాతంత్య్ర యోధులతో పాటు వివిధ రంగాల్లో ప్రముఖుల జీవిత చరిత్రలతోపాటు అవార్డులు పొందిన ప్రముఖ వ్యక్తుల ప్రత్యేక ఇంటర్వ్యూలతో వారి అనుభవాలను యువతకు టీ-సాట్ అందుబాటులోకి తెస్తుంది. యువతకు మార్గదర్శకంగా ఉండే చిత్రాలను కూడా టీ-సాట్ ప్రసారం చేస్తూ వారిని ప్రోత్సహిస్తుంది. వివిధ భాషాలపై యువత నైపుణ్యం పెంచుకునేందుకు తెలుగు, ఇంగ్లీష్, హిందీ, ఉర్దూ భాషలపై ప్రత్యేక కార్యక్రమాలతో వీడియోలను రూపొందించి అందుబాటులోకి తెచ్చింది.
ప్రత్యేక తెలంగాణ రాష్ట్ర ఆవిర్భావం తర్వాత ప్రారంభించిన టీ-సాట్ 2015 నుండి 2024 వరకు నెట్వర్క్, సోషల్ మీడియా ద్వారా 22 వేలకు పైగా ప్రజలకు ఉపయోగకరమైన వీడియోలను అందుబాటులోకి తేవడంతో లక్షకు పైగా వ్యూస్, 8 లక్షలకు పైగా సబ్స్క్రైబర్స్తో ఆదరణ పొందుతుంది. గత ఏడాది కాలంలో ప్రభుత్వం టీ-సాట్పై ప్రత్యేక దృష్టి పెట్టింది. ఇందులో భాగంగా సీఈఓగా నియమితులైన వేణుగోపాల్ రెడ్డి సంస్థలో పెద్దఎత్తున మార్పులు తీసుకొని రావడంతో తక్కువ సమయంలోనే 5 వేలకుపైగా వీడియోలను అప్లోడ్ చేయడంతో 128.2 లక్షల వ్యూస్ రావడమే కాకుండా భారీగా సబ్స్క్రైబర్స్ పెరిగారు. ప్రత్యేకంగా పోటీ పరీక్షలకు సిద్దమవుతున్న విద్యార్థుల కోసం టీ-సాట్ 30 వేలకుపైగా వీడియోలను తమ నెట్వర్క్లో అప్లోడ్ చేసింది. టీ-సాట్ 16 శాటిలైట్ల ద్వారా తెలంగాణ రాష్ట్రంలో సుమారు 80 లక్షలకుపైగా కుటుంబాలకు డిజిటల్ ప్రసారాలను నేరుగా అందిస్తూ రాష్ట్రంలోని ప్రతి ఇంటికీ చేరువయ్యేందుకు ప్రయత్నిస్తుంది.
‘నిపుణ’ పేరిట టీ-సాట్ ప్రత్యేక కార్యక్రమాలను ప్రసారం చేస్తుంది. ప్రొఫెసర్ జయశంకర్ వ్యవసాయ విశ్వవిద్యాలయం, తెలంగాణ పశుసంవర్థక శాఖలతో సమన్వయం కుదుర్చుకొని రైతుల కోసం ప్రత్యేక కార్యక్రమాలను రూపొందిస్తుండడంతో వ్యవసాయ రంగానికి లబ్ది కలుగుతుంది. వైద్య రంగానికి సంబంధించి టీ-సాట్ ప్రజలకు వైద్య సలహాల అందించేందుకు వివిధ విభాగాలకు చెందిన వైద్య నిపుణులతో ప్రత్యేకంగా ముఖాముఖి కార్యక్రమాలను ఏర్పాటు చేయడంతో వీక్షకులకు ఉచితంగా విలువైన సమాచారం అందుతుంది. మహిళా అభివృద్ధి శిశు సంక్షేమానికి సంబంధించి టీ-సాట్ ప్రీ స్కూల్ పిల్లల కోసం ప్రతిరోజు ఒక గంటపాటు ప్రత్యేక కార్యక్రమాలను ప్రత్యక్ష ప్రసారం చేస్తుండడంతో రాష్ట్ర వ్యాప్తంగా చిన్నపిల్లలతో పాటు అంగన్వాడీ టీచర్లకు, కార్యకర్తలకు ప్రయోజనకరంగా ఉంది. తెలంగాణ సంస్కృతిని నేటి తరానికి అందించడానికి కృషి చేస్తున్న టీ-సాట్ బోనాలు, బతుకమ్మ పండుగలపై ఆకర్షణీయమైన వీడియోలను రూపొందించి అన్ని వర్గాల వారికి చేరువవుతుంది.
టీ-సాట్లో నాణ్యత పెంపు కోసం ఆధునికానికి అనుగుణంగా సమాచారాన్ని సరళతరం చేస్తూ చిన్నచిన్న వీడియోలు రూపొందిస్తూ వాటిని ఆకర్షణీయంగా తీర్చిదిద్దేందుకు ప్రత్యేకంగా గ్రాఫిక్స్ అండ్ ఎడిటింగ్ టీమ్ను ఏర్పాటు చేయడంతో అవి ప్రజాదరణ పొందుతున్నాయి. అంతేకాక, టీ-సాట్ నెట్వర్క్ ఛానెల్ ద్వారా ప్రసారమయ్యే కార్యక్రమాలను టీ-సాట్ ఈ-మ్యాగజైన్ ద్వారా ఈ-లైబ్రరీలో అందుబాటులో ఉంచడంతో కావాల్సినప్పుడు సమాచారాన్ని పొందే అవకాశం ఏర్పడింది. హైదరాబాద్ బుక్ ఫెయిర్లో టీ-సాట్ స్టాల్ ప్రత్యేక ఆకర్షణగా నిలవడమే కాకుండా, ఈ సంస్థ చేపట్టే కార్యక్రమాలు తెలుసుకొని పుస్తకప్రియులు ముగ్గులవుతున్నారు.
తెలంగాణ రాష్ట్ర ముఖ్యమంత్రి రేవంత్రెడ్డి నేతృత్వంలో ఐటీ, కమ్యునికేషన్ల శాఖ మంత్రి శ్రీధర్బాబు మార్గదర్శకత్వంలో దూసుకుపోతూ యువతకు దిక్సూచిలా మారిన టీ-సాట్ విద్యా ప్రసార ఛానళ్లలో 4.8 మిలియన్ యూజర్లతో రికార్డు సృష్టించి దేశంలోనే ప్రథమ స్థానంలో నిలిచింది. విప్లవాత్మక మార్పులతో విద్య, వ్యవసాయం, ఆరోగ్యం, సంస్కృతి, నైపుణ్య రంగాల కోసం ప్రత్యేకంగా ఐదు యూట్యూబ్ ఛానళ్లను ఏర్పాటు చేసి తెలంగాణలో ఇంటింటికీ చేరువై ఆదరణ పొందుతున్న టీ-సాట్ రాష్ట్రంలో అన్ని రంగాల వారికి వరంలా మారిందనడంలో అతిశయోక్తి లేదు.
- ఐ. వీ. మురళీ కృష్ణ శర్మ
